काठमाडौं । बौद्धमार्गी विद्यार्थी संगठनहरुले छाता संगठन निर्माणको लागि पहल थालेका छन् । राजधानीमा प्ररम्भिक छलफल गर्न भेला भएका विद्यार्थी संगठनले नेपाल बौद्ध विद्यार्थी महासंघ गठनका लागि पहल थालेका हुन् ।
बौद्धमार्गी विद्यार्थी संगठनहरु शेर्पा, मगर, तामाङ, थारु, नेवार, ह्योल्मो-योल्मोपा, गुरुङ, भोटे लगायतले महासंघ गठनका लागि पहल थालेको भेला आयोजना गर्न संयोजनको भूमिका निर्वाह गरेका नेपाल शेर्पा विद्यार्थी मञ्चका बरिष्ठ उपाध्यक्ष साङ्गे मिङमा शेर्पाले जानकारी दिए ।
नेपाल बौद्ध महासंघका अध्यक्ष फुपु छेम्पे शेर्पाको विशेष उपस्थितीमा भएको भेलाले छिट्टै वृहत्त भेला आयोजना गरेर महासंघ घोषण गर्न ७ सदस्यीय तयारी समिति गठन गरेका छन् ।
साङ्गे मिङमा शेर्पाको अध्यक्षतामा गठित तयारी समितिले महासंघ गठनको लागि अवधारण पत्र तयार गरेर पेश गर्ने समेत निर्णय गरेको छ । विभिन्न घटक संगठन र आदिवासी विद्यार्थीहरुको समेत समर्थनमा संगठन विस्तार गर्न लागेको र संगठनले बुद्धका विचार, दर्शन र सिद्धान्तलाई आत्मसाथ गर्दै बौद्ध विद्यार्थीहरुको हकहितका लागि भूमिका निर्वाह गर्ने नेवा विद्यार्थी दवुका नेवाना तण्डुकारले जानकारी दिइन् । भेलामा नेपाल शेर्पा विद्यार्थी मञ्चका अध्यक्ष निमा दोर्जे शेर्पालगायतले आफ्नो विचार राखे ।