धुसेनी (लमजुङ), ८ जेठ । भिषण हावाहुरी र असिना पानीले मकै र केराखेती सखाप पारेपछि लमजुङका किसान मर्कामा परेका छन् ।

लामो खडेरी जसोतसो झेलेका किसानले भिषण असिनापानीका कारण मकै र केरा खेतीसमेत सखाप पारेपछि थप समस्यामा परेका हुन् । असिनापानीका कारण लमजुङको धुसेनी, नेटा, गिलुङ, पसगाउँ, भोजे, गाविस तथा करापुटार र मध्यनेपाल नगरपालिकाका ९० प्रतिशत मकैखेतीमा क्षति पुगेको कृषि विकास कार्यालयले लमजुङले जनाएको छ ।

खेत तथा बारीमा लगाएका सबै मकै सखाप भएपछि कतिपय किसान भने पाखाबारीमा भए पनि मकै लगाउने तयारीमा छन् । तर कृषि विकास कार्यालय लमजुङले भने आफूसँग मकैको बीउ नभएको र मकैको सिजन समेत सकिएकाले समस्या भएको बताएको छ । चितवन लगायतका केही स्थानमा बीउ पाउन सकेको अवस्थामा भने आफूहरुले केही सहयोग गर्ने कृषिप्रसार अधिकृत प्रकाश वस्ताकोटीको भनाइ छ ।

। असिनाका कारण केराका घरीमा समेत क्षति पुगेको छ । हावाहुरीका कारण अधिकाशं केराका रुख ढलेका छन् भने बाँकी केराका घरीमा समेत असिनाले व्यापक क्षति पुगेको किसानले दुःखेसो गरेका छन् ।