काठमाडौं । सत्ता साझेदार नेकपा (माओवादी केन्द्र) कर्मचारीको आधिकारिक ट्रेड युनियनको निर्वाचनमा चौथो स्थानमा खुम्चिएको छ । माओवादी निकट राष्ट्रिय कर्मचारी संगठन मधेसी मोर्चा निकट नेपाल मधेसी निजामति मञ्चभन्दा पछि परेको हो । राजनीतिक भागबण्डाका आधारमा भएको निजामति कर्मचारीहरुको आधिकारिक ट्रेड युनियनको निर्वाचनमा माओवादी निकट कर्मचारी संगठन जम्मा २ वटा केन्द्रमा मात्रै पहिलो भएको छ ।

मधेसी निजामति मञ्चले ७ केन्द्रमा पहिलो स्थान पाएको छ भने काँग्रेस निकट ट्रेड युनियन २७ स्थानमा पहिलो भएको छ ।

बुधबार भएको निर्वाचनमा एमाले निकट कर्मचारी संगठन ८० स्थानमा जित हात पार्दै पहिलो भएको छ । बुधबार सम्पन्न निर्वाचनमा देशभरि एक सय १७ वटा केन्द्र तोकिएका थिए ।

मत परिणाम अनुसार ट्रेड युनियनको पदाधिकारीमा एमाले निकट नेपाल निजामति कर्मचारी संगठनले अध्यक्ष र कोषाध्यक्ष पद पाउनेछ, नेपाल निजामति कर्मचारी युनियनले महासचिव, नेपाल मधेसी निजामति मञ्चले उपाध्यक्ष र नेपाल राष्ट्रिय कर्मचारी संगठन निजामतिले सचिव पद पाउने भएका छन् ।