काठमाडौं । स्टार स्ट्राइकर लियोनल मेस्सीको ह्याट्रिकसँगै अर्जेन्टिना कोपा अमेरिकाकप फुटबलको क्वाटरफाइनलमा पुगेको छ । शनिबार बिहान अमेरिकाको सिकागोमा भएको खेलमा अर्जेन्टिनाको जितमा लियोनल मेस्सीले ह्याट्रिक गरे भने अतामेन्डी र सर्जियो अग्वेरोले एक एक गोल गरे । पहिलो हाफमा बेन्चमा रहेका मेस्सी ६१ औं मिनेटमा मैदान प्रवेश गरेका थिए ।

मैदान प्रवेश गरेको ७ मिनेटपछि नै गोन्जालो हिगुएनको पासमा गोल गर्दै उनले अर्जेन्टिनालाई २–० ले अघि बढाए । खेलको ७८ औं मिनेटमा फ्रिकिकमार्फत उत्कृष्ठ गोल गरेका मेस्सीले ८७ औं मिनेटमा ह्याट्रिक पूरा गरे ।

खेलको अन्तिममा सर्जियो अग्वेरोले गोल गरेपछि अर्जेन्टिना ५–० ले विजयी हुँदै प्रतियोगिताको अन्तिम आठमा पुगेको हो । पहिलो खेलमा उसले गत संस्करणको विजेता चिलीलाई २–० ले पराजित गरेको थियो ।

खेलको ३१ औं मिनेटमा पानामा १० खेलाडीमा सिमित भएको थियो । लगातार दोस्रो पहेँले कार्ड पाएका गोडोआई रातो कार्ड खाँदै मैदानबाट बाहिरिएपछि पानामा १० खेलाडीमा सीमित हुन पुगेको थियो ।