क्यानाडाखबर संबाददाता
टोरोन्टो,क्यानाडा ।
अन्तराष्ट्रिय पौडी खेलाडी शिरिस गुरुङलाई क्यानाडामा सम्मान गरिएको छ । ब्राम्टोन माउण्ट एभरेष्ट लायन्स क्लबले मिसिसागामा एक कार्यक्रम आयोजना गरि खेलाडी गुरुङलाई सम्मान गरेको हो ।
कार्यक्रममा बोल्दै खेलाडी गुरुङले भने – ‘खेलकुदको माध्यमबाट नै आफ्नो मुलुकलाई संसारभर चिनाउंन सकिने भएकाले नेपालमा पौडी खेलको बिकासमा सबैले चासो दिनु पर्ने समय आएको छ ।’ राज्यले मुख्य खेलहरुलाई मात्र लगानी बढाएर अन्य खेलहरुलाई उचित चासो दिन नसकेको उनको गुनासो छ ।
शिरिस गुरुङ सहितको खेलाडी टोली लिएर क्यानाडा आएका नेपाल पौडी संघका महासचिब जगत श्रेष्ठले नेपाली खेलकुद क्षेत्रको बिकास र चुनौतीका बिषयमा आफ्ना धारणा राखे । पछील्लो समय पौडी खेल संसारभर सबैको आकर्षण खेल बन्न पुगेका बेला नेपालमा भने यसको बिस्तार अझै ब्यापक हुन नसकेको श्रेष्ठले बताए ।
विन्डसोरमा जारी ‘फिना वल्ड च्याम्पियनसिप’मा सहभागी हुन गुरुङ सहित चार खेलाडी र अफिसियल टिम यही हप्ता क्यानाडा आएको थियो ।
खेलाडी गुरुङ र संघका महासचिब श्रेष्ठले खेलकुद क्ष्रेत्रमा पुर्याएको योगदानको कदर गर्दै प्रवासमा नै सम्मान गरी नेपाली प्रतिभालाई प्रोत्साहन गरिएको आयोजक संस्था माउन्ट एभरेष्ट लायन्स क्लबका अध्यक्ष मित्र काफ्लेले बताए ।